A estafa dos L. Casei (Piloto para IrmandadeTV)


O vídeo A estafa dos L. Casei foi publicado orixinalmente no canal do Youtube d'As MIR e unha noites en 11 de decembro de 2015. Foi un piloto para Irmandade TV, mais non tivo continuidade pola desaparición da produtora.




TRANSCRICIÓN:

Sabedes os iogures estes para beber que veñen en boteciños pequenos? Vaia, non son iogures, son leite fermentado, porque os iogures son outra cousa. Pero sabedes de cal vos falo, non? Estes que son bos para as defensas que anuncian... Os Actimel, vaia.

Pois se vedes os anuncios de Actimel, veredes que no anuncio, con letras moi grandes, anuncian que teñen L. Casei Imunitas. Incluso lembro aquel anuncio de antes que dicía: "Ele, Casei, Imunitas, Equipo Actimel!". Pois ben, é certo que teñen L. Casei. E é certo, até certo punto, que son bos para as defensas porque así se poden anunciar. Pero unha cousa non ten que ver coa outra. E explícome.

Os Actimel teñen unha cousiña, uns bichiños, chamados L. Casei Imunitas. Que agora se chaman L. Casei Danone. Porque sabedes que aos publicistas lles gusta moito facer isto, non? Como aquilo de: "Mister Proper fue al principio ahora se llama Don Limpio". Pero estoume indo do tema... Os L. Casei Danone! Os L. Casei Danone son unha cepa das bacterias L. Casei que están patentadas por Danone, teñen eles a patente. Existen outras marcas brancas que teñen outro tipo de L. Casei, pero Danone ten un propio que patentou el. E non está demostrado baixo ningún estudo científico que realmente sexan bos para as defensas. Non son malos. Pero non hai evidencia científica que avale que sexan bos, que melloren o sistema inmunitario. Si que é certo que poden ser bos para a biota intestinal pero tampouco está demostrado que sexan mellor que as bacterias que pode ter, por exemplo, un iogur natural.

Entón, por que se anuncian como que son bos para o sistema inmunitario? Pois vamos botar unha ollada entón á embalaxe. Vedes que na parte de riba aparece: "Actimel, con L. Casei Danone e vitaminas B6 e D". E se vedes debaixo está o slogan, e detrás da palabra "defensas" ten un pequeniño asterisco. Aí, de maneira ínfima, que case non se percibe. Pois ben, vamos entón mirar aonde nos leva ese asterisco. Se mirades na parte de baixo non está, está nun lateral, alí agachadiño, de maneira que non se ve ben, e pon o seguinte: "As vitaminas B6 e D contribúen ao funcionamento normal do sistema inmunitario".

E aí é onde está o truco.

Porque si é certo que as vitaminas B6 e D contribúen ao sistema inmunitario, porque hai evidencia científica que o demostra, e porque así o admite a Autoridade Europea para a Seguranza Alimentaria. Pero... vamos mirar entón a información nutricional. E vemos que realmente a cantidade que ten de vitamina B6 é 15% da cantidade diaria recomendada, que é tres veces menos que o que ten. por exemplo, a banana. E a vitamina D ten outro 15% da cantidade diaria recomendada, que é tres veces menos do que ten o atún en lata. Entón, ten estas vitaminas? Si, tenas. E é bo para o sistema inmunitario? Pois, oes, é bo. Pero é necesario? Non. Porque cunha dieta equilibrada xa temos cubertas sobradamente as necesidades diarias de vitamina D e de vitamina B6. Entón, non fai falta.

E ollo, estou falando moito de Danone, pero isto non é exclusivo de Danone. Se vamos a unha marca branca, como por exemplo Hacendado, —tendes aquí a embalaxe de Hacendado— vedes que incluso teñen unha publicidade máis rastreira e se vos fixades, o asterisco, en cor branca, está disimulado e parece unha pinga de leite máis dentro de o que é a embalaxe.

Entón, se vos gusta o Actimel, se vos gusta como sabe, ou se vos é cómodo, ou... as vosas movidas para querer tomalo, tomádeo. Mal non vos vai facer. Pero non vos deixedes enganar, porque non é bo para as defensas. Saudiña!