Player.me, o perfil dos xogadores


O artigo Player.me, o perfil dos xogadores foi publicado orixinalmente en Memoria Pixelada en 19 de febreiro de 2014.



Vivimos nunha época dominada polas redes sociais. A maioría da xente que nos estades a ler tendes perfil en Facebook, Twitter, Google+ (pode que non o saibades, mais tendes), Youtube, Instagram... e mesmo alguén conservará o do Tuenti. E foi esta diversidade de redes a que levou á aparición de servizos de perfís simples onde reunir toda a información e ligazóns ás túas redes sociais, unha sorte de cartóns de visita da era cibernética. Deste modo xurdiron iniciativas con bastante éxito como about.me.
E agora, meu querido lector, estarás a pensar: Moi ben, moi interesante todo, pero que carallo ten isto que ver cos videoxogos?. Acouga un pouco, queres? Non vaia ser que me quente, saque a Nintendo 64 e che dea unha malleira no Smash Bros.
Neste escenario nace player.me, o servizo de perfís para gamers. Aínda está en beta pechada e só se pode acceder mediante convite, mais podedes ver xa algúns perfís para vos facer unha idea de como vai. Tes a túa páxina coa túa foto, os teus perfís nas redes sociais e plataformas de xogo online, unha colección dos teus vídeos (para os teus gameplays ou reviews), unha listaxe dos teus xogos favoritos e unha bio para falares un pouco de ti. Tamén inclúe a opción de seguir aqueles perfís que che interesen, para estar atento ás novidades.

Poida que non vaia revolucionar a internet, mais é un servizo ben interesante para os que fan dos videoxogos a súa forma de vida.

Temén che pode interesar... | As redes sociais para videoxogadores